Falta "profesionalización" no servizo contra incendios da Xunta
martes, 2 de agosto de 2016, 12:43
O delegado de UGT na Consellería do Medio Rural de Lugo, José Manuel Pérez, lamentou este martes a "falta de profesionalización" no servizo de incendios do Goberno autonómico.
Pérez reprochou que se traballa "con xente nova todos os anos, contratando persoal por empresas, por concellos", á vez que censurou que se estea "externalizando todo o servizo". "Está a entrar xente nova todos os anos e non se reforza o servizo", abundou.
Nesta liña, o delegado sindical concretou que a externalización se produce "a través dos concellos, de Seaga ou a empresa Naturtecnia".
Ademais, debullou que existen moitos "contratos en precario" e denuncia que as brigadas dos concellos aínda "están a empezar estes días". "Esa xente con tres meses non poden profesionalizarse", insistiu.
Sobre a situación en Lugo precisou que "só hai dúas brigadas helitransportadas da Xunta; unha que opera durante nove meses e outra con contratos de tres meses e é o único persoal". Tamén alertou de que o "monte está como está, a vexetación crece". "E canto máis nos achegamos á zona Sur (de Lugo) a diferenza é máis grande en canto á temperatura", concluíu.