A fin da campaña de verán devolve ao paro a 1.300 galegos
martes, 4 de octubre de 2016, 09:32
O número de parados rexistrados nas oficinas dos servizos públicos de emprego (antigo Inem) subiu en setembro en Galicia en relación co mes anterior en 1.291 persoas (+0,67%), ata situar o total en 194.336 desempregados, segundo os datos que publica este martes o Ministerio de Emprego.
En comparación con setembro de 2015, con todo, a comunidade galega conta con 21.401 parados menos, o que supón un descenso do 9,92%.
No conxunto estatal, foron 22.801 persoas máis en paro respecto de agosto (+0,6%). Aínda así, o total de desempregados continuou nos seus niveis máis baixos do últimos sete anos ao situarse en 3.720.297 parados.
AFILIACIÓN Á SEGURIDADE SOCIAL
A Seguridade Social perdeu en setembro 6.218 afiliados en Galicia en relación co mes anterior, o que supón un descenso do 0,64%, ata situar o total de cotizantes en 972.887, de acordo coa información que fixo pública este martes o Ministerio de Emprego.
No conxunto estatal, os afiliados subiron unha media de 12.025 persoas (+0,07%) respecto de agosto, o que situou o número de ocupados en 17.712.021 cotizantes.