O novo ministro de Fomento outórgalle ao AVE un "papel fundamental"
lunes, 21 de noviembre de 2016, 11:52
O ministro de Fomento, Íñigo de la Serna, prevé iniciar este mesmo luns unha rolda de contactos con todos os partidos políticos para tratar de alcanzar un acordo sobre un plan nacional de infraestruturas, no que o AVE seguirá tendo un "papel fundamental".
A negociación coas formacións políticas sumaranse ás que pretende manter cos presidentes das distintas comunidades autónomas, que tamén empezou este luns. Polo momento, o calendario previsto da conexión da alta velocidade Madrid-Galicia mantén o 2018 como límite.
"Temos vontade de lograr un pacto nacional de infraestruturas e transportes, no que se inclúa un acordo sobre as principais actuacións a abordar e para iso, no día de hoxe empezarei unha rolda de contactos cos partidos políticos para ver como podemos abordar ese pacto nacional fundamental para dar estabilidade", indicou De la Serna en declaracións á Cope recollidas por Europa Press.
O novo titular de Fomento avanzou que o transporte ferroviario e o AVE seguirá tendo un "papel fundamental" no eventual pacto nacional.
"Trátase dun transporte fundamental porque xa está a ser competitivo con outros medios de transporte, e colócanos en posición de liderado mundial, como demostra o proxecto do AVE á Meca, co que España debe consolidar a súa posición ferroviaria", asegurou o ministro.