Os turistas de cruceiros que chegan á Coruña valoran a limpeza da cidade
lunes, 26 de diciembre de 2016, 10:31
Unha enquisa municipal promovida pola Consellería de Medio Ambiente do Concello da Coruña sobre a percepción socioambiental da cidade revelou que os turistas de cruceiros ven positivo o estado de limpeza desta, outorgándolle unha puntuación de 4,7 sobre 5.
Segundo informou o Concello da Coruña nun comunicado, a sondaxe realizouse entrevistando a 654 turistas dos 13 cruceiros con maior número de pasaxeiros que fixeron escala na cidade nos meses de outubro e novembro.
Os entrevistados cualificaron a cidade como "bonita, segura e de xente agradable" e a única queixa xeneralizada foi en relación a establecementos que non empregaron o inglés para comunicarse cos turistas.
A enquisa buscaba aproximarse á percepción que teñen os turistas de cruceiros en relación a aspectos varios como a información turística dispoñible, a oferta de transporte público, o patrimonio cultural ou a calidade ambiental e acústica.
En xeral, os aspectos ambientais foron mellor valorados que os turísticos, destacando particularmente o estado de limpeza da cidade. A media de idade dos turistas consultados foi superior aos 59 anos nun 54,7 por cento dos casos. En canto ao xénero, houbo practicamente paridade.