Garitano deixa a Álex Bergantiños na Coruña para a volta contra o Alavés
miércoles, 11 de enero de 2017, 11:08
Álex Bergantiños, saudando os afeccionados. // Foto: RC Deportivo
O Deportivo xoga en Mendizorroza fronte ao Alavés o pase a cuartos de final da Copa do Rei e Garitano deixou só na Coruña a Álex Bergantiños dos xogadores de campo. O adestrador ábrelle a porta a unha posible saída neste mercado de inverno.
O axente do xogador coruñés recoñeceu nunha entrevista radiofónica que mostraron interese "tres ou catro equipos de Primeira, da zona de abaixo". Tamén podería saír a algún equipo da Segunda e mesmo aos Estados Unidos. Porén, o que é un dos capitáns do Dépor non o ve na da claro. "Álex non vai tirar a toalla, ten que ser algo moi claro para todas as partes para que saia", declarou Rafael Rodríguez, o axente.
"Cada temporada custoulle moito, primeiro chegar, quedar na pretemporada, logo ser titular e chegar a ser capitán. Como lle custou tanto chegar, saír agora é moi complicado", sostivo. No caso de dar o paso de marchar, o xogador preferiría marchar aos Estados Unidos que xogar noutro equipo español, "pero é difícil por todas as connotacións" porque "o club conta con el de cara ao futuro como persoa de club, e é un matiz moi importante para tomar a decisión".