A irresistible tentación do adianto electoral
Aumentan os rumores dun adianto electoral en Galicia para facer coincidir as eleccións autonómicas cunhas hipotéticas xerais
Ata hai ben pouco Alberto Núñez Feijóo sempre mantivera o mesmo discurso: Galicia é un exemplo de estabilidade que se debe coidar, polo que o plan é esgotar a lexislatura e celebrar as autonómicas en outubro. Pero as cousas cambian con rapidez no panorama político actual. A probable convocatoria de eleccións xerais en xuño ofrécelle ao presidente da Xunta unha gran oportunidade para facer coincidir os comicios cos galegos, aforrando unha convocatoria electoral e de paso aproveitando a debilidade duns rivales aínda sen candidato.
Foi o propio Feijóo o que abriu a caixa dos tronos nunha entrevista publicada este domingo, recoñecendo que o adianto electoral era unha opción "enriba da mesa", aínda que insistiu que o factor da estabilidade pesaría de forma contundente na súa decisión final.
"Comprendo, en todo caso, que os galegos se pregunten se é se é lóxico que sexan chamados ás urnas en xuño e en outubro", afirmou alentando os rumores. Como posible explicación do adianto podería esgrimirse o aforro de diñeiro público que suporía celebrar os dous comicios dunha soa vez.
Pero tamén é evidente que o Partido Popular galego é neste momento o máis adiantado para unha hipotética carreira electoral. Coa notable excepción de Democracia Ourensana, o PPdeG é o único partido con candidato para a Xunta.
No PSdeG están pendentes da convocatoria de primarias que se anunciará esta mesma semana. A confluencia En Marea está pendente do proceso aberto en Podemos Galicia para elexir ao seu novo líder e no bloque aínda non confirmaron se a nova voceira xeral , Ana Pontón, tamén optará á Xunta de Galicia.
En calquera caso, canto menos parte da oposición parece disposta a aceptar o reto dunha eleccións en xuño. O coordinador de Anova e vicevoceiro parlamentario de AGE, Antón Sánchez, chamou a "convocar xa" eleccións autonómicas, convencido de que vai haber "unha marea en Galicia que vai derrotar ao PP". "Sempre diximos que tiñamos que estar preparados por se o había (o adianto)", apuntou.
Tamén no BNG traballan coa hipótese dun adianto electoral, según expresou este luns a súa voceira nacional Ana Pontón, que non quixo confirmar se se presentará no proceso interno do partido para elexir ao candidato para a Xunta.
Os únicos que a día de hoxe afirman claramente non contar cun adianto electoral son os propios populares. O seu voceiro parlamentario, Pedro Puy, sinalou que o seu grupo traballa "coa perspectiva" de que se celebren cando están previstas, no vindeiro mes de outubro.
Escribe tu comentario