O PSdeG tamén pide parar a implantación da LOMCE en Galicia
viernes, 8 de abril de 2016, 13:36
Os socialistas galegos uníronse á reclamación da Plataforma Galega en Defensa do Ensino Público, reclamándolle este venres á Xunta a “inmediata paralización do calendario de implantación da Lomce en Galicia”.
O responsable socialista de educación, Vicente Docasar, ofreceuse a manter unha entrevista co conselleiro de Educación para “explicarlle que non queremos xerar un baleiro legal, queremos substituír unha norma ineficaz por outra mellor e de
consenso”.
Docasar sinala que a aprobación esta semana no Congreso, por iniciativa do PSOE, do comezo da tramitación da paralización da norma, fai necesario que o goberno galego paralice o seu calendario de implantación, que “segue sendo precipitado, caótico, inasumible, trapalleiro e temerario”.
Entre as principais reclamacións dos socialistas está que se pare "de maneira inmediata” a reválida de sexto de primaria prevista para o mes de maio. . Explicou que para evitar o baleiro legal de derrogar a Lei sen substituíla é preciso primeiro paralizala, a continuación acordar un novo texto co conxunto da comunidade educativa e finalmente derrogar a Lomce.
Acusou ao goberno galego de secundar a implantación dunha norma que supuxo que “este país perdera por motivos sectarios e claramente partidarios unha nova oportunidade de dotar de estabilidade ao sistema educativo”. Dixo que “quixeron deixar atada e ben atada unha Lei educativa que ninguén quería, pero esqueceron o pequeno detalle de que había pendentes unhas eleccións xerais”.