Sanidade estudará a condena ao Sergas por "fraude" en contratación de eventuais
viernes, 30 de septiembre de 2016, 16:39
O conselleiro de Sanidade en funcións, Jesús Vázquez Almuiña, informou de que o seu departamento estudará a semana que vén cos sindicatos a sentenza que condena ao Sergas por "fraude" na contratación de persoal eventual.
A preguntas dos xornalistas antes de participar nun acto en Santiago, o responsable en funcións da área sanitaria do Goberno galego advertiu de que "ás veces se fan comentarios que non son acertados", polo que apelou a unha revisión en profundidade do fallo.
"Hai que revisala, hai que estudala moi ben e a semana que vén imos facer unha valoración de todo isto cos representantes sindicais", subliñou, sobre a sentenza.
Neste sentido, agregou que é "complexa" e que contén "algunhas cousas que non están aínda demasiado claras". "Estamos a facer o estudo pormenorizado e despois falaremos cos representantes sindicais para tratar de facer o que corresponde dentro dunha idea loxicamente, como sempre fixemos, de manter un magnífico servizo sanitario en Galicia", profundou.
Sobre a data do encontro que a consellería manterá coas organizacións sindicais, apuntou que será a semana que vén pero que aínda non ten "o día pechado".