A Xunta acatará o que decida o Goberno sobre a deportación do mozo paraguaio
martes, 29 de noviembre de 2016, 12:53
O vicepresidente da Xunta, Alfonso Rueda, remarcou en relación ao veciño de Santiago de 19 anos que foi deportado o pasado fin de semana ao seu país de orixe --Paraguai-- que a Administración autonómica vai acatar o que decida a Delegación do Goberno, por ser a que ten as competencias neste ámbito.
Así se pronunciou durante unha visita á Asociación de Empresarios de Mos (Pontevedra), ao ser cuestionado por se a Xunta pode facer algo neste caso. Acerca de que a Administración galega tutelou ao mozo entre os 14 e os 18 anos, Rueda recoñeceu que "no seu momento estivo tutelado porque se daban unha serie de circunstancias, que non teñen por que estarse dando agora".
"As circunstancias poden cambiar e as novas circunstancias que determinan esas decisión quen as sabe é a Delegación do Goberno", remarcou, lembrando que é o Goberno central quen ten as competencias para dicir quen permanece e quen non no territorio nacional. En todo caso, mostrouse seguro de que a decisión "se basea en criterios obxectivos".
"UNHA CUESTIÓN INDIVIDUAL"
O embaixador da República de Paraguai, Antonio Rivas Palacios, que estes días está de visita en Galicia, asegurou que as autoridades do seu país trataron coa Dirección Xeral de Migracións o caso do mozo deportado.
"É un caso que tratamos coa Dirección de Migracións e eles explicáronnos a situación, que se corresponde cunha cuestión individual do mozo. Estamos en conversacións con eles. Nada máis", subliñou o embaixador, en declaracións aos medios.
Rivas Palacios atendeu aos medios á entrada da residencia oficial de Monte Pío, onde mantivo un encontro co presidente galego, Alberto Núñez Feijóo.
Preguntado acerca de se abordará con Feijóo a situación deste mozo, reafirmouse en que o asunto se abordaría coas autoridades migratorias.
"Isto está manexado con eles, prefiro mantelo aí", resolveu.