O Corredor do Morrazo volve pechar este luns entre Rande e Meira
domingo, 8 de enero de 2017, 12:26
O Corredor do Morrazo permanecerá cortado ao tráfico a partir deste luns 9 de xaneiro. O tramo afectado é o comprendido entre os quilómetros 0 e 6, é dicir, entre os enlaces da ponte de Rande e o de Meira.
O treito reabriu o día 21 de decembro con motivo da operación especial de tráfico que a DXT activou no período vacacional. A partir de agora, agárdanse novamente grandes atascos en Moaña, polo desvío da circulación.
Segundo informou a Xunta, o corte débese a "a necesidade de garantir a seguridade de usuarios e traballadores no transcurso das obras de conversión en Autovía desta infraestrutura".
Deste xeito, a circulación nesta vía permanecerá interrompida "ata o final das voaduras máis importantes". Durante o tempo que dure o corte ao tráfico, o Goberno galego reforzará "a información aos cidadáns", así como "a sinalización para ofrecerlles indicacións concretas e precisas aos usuarios sobre as alternativas de comunicación e os desvíos que poden tomar".
Así as cousas, a Xunta engadiu que esta decisión "minimiza os riscos" e permitirá "concentrar os traballos de maior entidade no menor tempo posible", polo que está previsto que o prazo de execución dos desmontes previstos redúzase "case á metade".