Sete imputados pola retirada de multas en Ourense optan por non declarar

Os sete imputados na Operación Pokémon pola suposta participación na retirada de multas relacionadas con Vendex e o Concello de Ourense que estaban citados para esta mañá nos xulgados de Lugo optaron por non declarar ante a xuíza instrutora, Pilar de Lara.

Segundo informou o Tribunal Superior de Xustiza de Galicia (TSXG), os sete seguen na mesma situación procesual. Para a tarde deste luns están citadas outras oito persoas tamén imputadas pola retirada de multas en Ourense.

Estas citacións prodúcense despois de que o pasado 25 de maio comparecesen ante o Xulgado de Instrución número 1 de Lugo outros 14 imputados neste caso, entre eles o exalcalde de Ourense Francisco Rodríguez e cargos de Vendex como Adrián Cordero e José María Tutor Lemos. Estes imputados tamén rexeitaron declarar ante Pilar de Lara.