Investigan un incendio que calcinou unha granxa en Melón, no que morreron máis de 32.400 pitos

Un incendio ocorrido esta madrugada en Melón, en Ourense, arrasou dúas naves dunha granxa na que faleceron 32.400 pitos que se criaban no interior, por causas que aínda descoñecen.

Segundo informou Urxencias de Galicia, un veciño do lugar alertou esta madrugada de que estaban a arder dúas naves dunha granxa, nunha zona próxima a unha gasolineira. Ademais, o lume calcinou un tractor e un camión, os cales se viron afectados as chamas.

Tras a alerta, producida ao redor das catro da madrugada, o 112 Galicia deu aviso ao Grupo de Urxencias Supramunicipal (GES) de Ribadavia, Garda Civil e a persoal municipal. Polo momento, descoñécense as causas que provocaron do incendio.

Segundo explicou a alcaldesa de Melón, Cristina Francisco Vílchez, tras recibir a chamada de Urxencias, ata o lugar desprazaron un coche de Bombeiros e o GES de Ribadavia, quen non puideron facer nada xa que as naves "estaban practicamente calcinadas". A pesar de todo, destacou que finalmente o incendio púidose controlar e non houbo que lamentar outras desgrazas, xa que nas proximidades, había unha gasolineira e unha fábrica de madeira, que podían haberse visto afectadas. "Dentro do malo, aínda tivemos a sorte de que un veciño viu o incendio pois puido ser moito peor", asegurou.

A granxa, que criaba pitos para Coren contaba cunha longa tradición. Tal e como detallou Vílchez, a familia -que reside fóra de Melón- levaba traballando corenta anos na granxa polo que se atopa moi afectada. "Ver isto logo de corenta anos de traballo é moi forte", sentenciou.

Os investigadores tratan de esclarecer as causas e a orixe deste incendio.