​Un coche en sentido contrario provoca un accidente mortal en Noia

Unha muller de 88 anos de idade faleceu este domingo pola mañá nunha colisión frontal en Noia (A Coruña) tras invadir un dos dous coches o sentido contrario.

Segundo indicaron fontes da Garda Civil, o sinistro produciuse ás 9,40 horas deste domingo aproximadamente, concretamente na vía AC-550, no punto quilométrico 75 e en sentido Outes (A Coruña).

Foi unha colisión frontal entre un Citroën Saxo e un Citroën C2, pois, ao parecer, un dos dous vehículos invadiría o sentido contrario. Debido á colisión, ambas as condutoras resultaron lesionadas e a acompañante, de 88 anos, faleceu.

Ante este feito, o equipo de atestados de Santiago instrúe dilixencias para tratar de determinar as causas do sinistro. O xulgado competente é o de Instrución de Garda de Noia.