Unha operación iniciada en Galicia desarticula un gran grupo de narcos

A Policía Nacional española e a de Marrocos veñen de desarticular un grupo de narcotraficantes que operaba entre os continentes europeo, africano e latinoamericano, e que estaba considerado como o "máis activo" desta zona, segundo informou o Ministerio do Interior.

A operación, a primeira intervención hispano-marroquí contra o tráfico internacional de cocaína por vía marítima, saldouse coa detención de 24 persoas e permitiu incautar máis 2,57 toneladas de cocaína que estaban a ser trasladadas a bordo dun pesqueiro.

En canto aos detidos, son cidadáns colombianos, españois e marroquís, dos que 18 foron arrestados en Marrocos e os outros seis, en España.

A organización desarticulada estaba asentada nos dous países e, segundo Interior, contaba cunha "gran capacidade económica e loxística" que lles permitía contar cun "enorme" despregamento de barcos para realizar tráfico de cocaína por alta mar. Ademais, utilizaban entre tres e catro embarcacións simultáneas "coa fin de dificultar a actuación policial".

A investigación que permitiu desarticular este grupo comezou en Galicia, cando axentes da Policía tiveron coñecemento de que se ía a realizar a entrega dun cargamento de cocaína a un coñecido narcotraficante galego nun punto do Océano Atlántico.

PESQUEIRO CONTROLADO DESDE GALICIA

O ingreso en prisión, por outro delito, do narcotraficante impediu que finalmente participase na recepción do cargamento de droga, que finalmente asumiu outra organización de orixe colombiana e liderada desde España, cuxo xefa realizaba numerosas viaxes entre Madrid, Bogotá e Venezuela.

As pescudas levaron á Policía a coñecer que o responsable da oficina colombiana do grupo en España estaba a promover un envío de droga desde Latinoamérica ata España que traspasarían a un pesqueiro controlado pola organización desde Galicia.

Así, axentes da policía españois e marroquís controlaron a embarcación que partiu de Latinoamérica ata que trasbordou a carga de cocaína ao pesqueiro. Cando esta embarcación navegaba en paralelo ás costas de Mauritania e Marrocos coa fin de alcanzar España coa droga oculta na súa adega é cando decidiron asaltalo.

ABORDAXE A UN PESQUEIRO CARGADO DE COCAÍNA

Os efectivos abordaron o pesqueiro desde un helicóptero marroquí e dúas patrulleiras xusto cando a embarcación se atopaba a unhas cen millas da costa do Sahara occidental.

Nese momento, a tripulación arroxou ao mar numerosos fardos de cocaína, aínda que no asalto foron detidas as doce persoas que atoparon a bordo e interceptáronse 2.575 quilos de cocaína, 10.000 euros, un teléfono satelital e diversa documentación.

En paralelo, ao ter coñecemento de que o líder do grupo de narcotraficantes dispoñíase a viaxar ata España desde Colombia para coñecer os detalles da abordaxe, interceptáronse e arrestáronse xunto a outro membro do grupo. O resto das detencións, a dos outros catro membros da organización, realizáronse en chan español.

En concreto, a operación foi realizada por axentes da Brigada Central de Estupefacientes e da Xefatura Superior de Policía de Galicia, da Sección IV da BCE, o GEO, do CITCO e MAOC da Secretaría de Estado de Seguridade, por grupos de Vixilancia e apoio da UDYCO Central; todo iso en colaboración coa Dirección Xeral de Seguridade do Territorio de Marrocos (DGST).

"IMPORTANTE GOLPE" 

O ministro do Interior, Juan Ignacio Zoido, felicitou á Policía polo "importante golpe" que se deu a "unha das principais redes de narcotraficantes" que operaba entre España, Marrocos e Latinoamérica.

Zoido destacou a "excelente" cooperación policial existente entre España e Marrocos, "non só para loitar contra o terrorismo ou a inmigración irregular, senón tamén para frear o tráfico de drogas por todos os medios no Estreito de Xibraltar".

O titular de Interior subliñou así mesmo a formación dos axentes na loitar contra o narcotráfico, pero tamén para analizar e investigar as infraestruturas económicas destas organizacións, un aspecto que considera "vital" para debilitar os recursos financeiros do crime organizado.

"A vontade política, a eficacia policial e o reforzo da cooperación internacional son os alicerces para acabar coas redes do crime organizado", concluíu o ministro nun comunicado.