A compravenda de vivendas en Galicia aumenta un 6% no primeiro trimestre

A compravenda de vivendas aumentou un 6,01% no primeiro trimestre en Galicia, ata 3.155, fronte ás 2.976 do mesmo período do ano anterior, segundo os datos do Ministerio de Fomento.

Ademais, aumentou un 12,2% entre abril de 2014 e marzo de 2015, ata 14.216 unidades, fronte ás 12.670 dos mesmos meses pero un ano atrás, segundo a estatística de transacción inmobiliaria.

Por provincias, entre xaneiro e marzo deste ano, as compravendas distribuíronse entre as 1.336 da Coruña, 920 de Pontevedra, 594 de Lugo e 305 de Ourense.

DATOS ESTATAIS

No conxunto estatal, as compravendas de vivendas sumaron 369.238 unidades ese tempo --de abril de 2014 a marzo de 2015--, o que bota un incremento do 12,8% en comparación con abril de 2013 a marzo de 2014.

Pola súa parte, no primeiro trimestre, a compravenda de vivendas en todo o estado creceu un 4,4 por cento, ata 85.133, o que supón o maior volume de transaccións trimestrais que se rexistra dende os tres primeiros meses de 2010, segundo destaca o Ministerio de Fomento nun comunicado.

Nel, indica que un total de 47 provincias rexistran incrementos anuais, mentres que en cinco provincias se producen descensos: Álava, Cáceres, Almería, Cidade Real e Castellón.

O 87,1% dos pisos comprados ata marzo correspóndense con residencias de segunda man, 74.153, e o 12,9% restante, con vivendas novas.

Así mesmo, as adquisicións de vivendas por parte de estranxeiros residentes en España eleváronse un 17,2 por cento, ata sumar 13.463 unidades, e encadearon así o seu décimo trimestre consecutivo á alza.