O ciclo de música e arte, conferencias e visitas guiadas centran as actividades do CGAC para esta semana

O Centro Galego de Arte Contemporánea (CGAC) acolle esta semana unha completa oferta de actividades culturais -para todos os públicos e totalmente de balde- centradas principalmente en torno ao Ciclo de Música e Arte. Ademais, quen se acheguen ata o recinto poden gozar dunha visita guiada á mostra de Val del Omar, unha xornada de Nerd Nite e unha conferencia de Bradley Epps.

O vindeiro martes día 16, ás 19,45 horas terá lugar ‘Causal’ un encontro cos compositores Eduardo Caballero (México, 1976), Pamela Madsen (EEUU), Alberto Arroyo (España, 1989), Iker Güemes (España, 1971), Alfonso Mendoza (México, 1988) e Nico Sauer (Alemaña, 1986) que, nesta ocasión, inspiraron as súas pezas na mostra ‘Tectónica’ do artista Manuel Vilariño. Ese mesmo día ás 20,30 horas comezará o concerto a cargo de Vertixe Sonora Ensemble.

O xoves 18 haberá dúas actividades. Por unha banda, dentro do ciclo Visitas guiadas por profesionais do ámbito cultural e artístico, Ramiro Ledo conducirá unha visita á exposición de Val del Omar ‘A mecamística do cine’. A visita partirá da recepción do centro ás 19,00 h e non será necesaria a cita previa. Posteriormente, ás 21,30 horas, o CGAC acollerá unha nova xornada de Nerd Nite, nesta ocasión dedicada ao recentemente falecido matemático e premio Nobel de Economía John Nash.

Para rematar a semana de actividades, o sábado 20, de 12,00 a 14,00 h, o catedrático de Literatura Española e profesor de literatura na Universidade de Harvard Bradley Epss, pechará o ciclo ‘Cara a onde? Observando a transformación cultural e social desde a literatura’ cunha conferencia baixo o título ‘A que(e)renza do normal: tensións e torceduras da identidade nacional e lingüística’.