A Mesa pola Normalización denuncia ante a ONU discriminación a falantes de galego

Marcos Manteiga, de pé á esquerda no Consello de Dereitos Humanos de Nacións Unidas

A Mesa pola Normalización Lingüística denunciou este xoves ante as Nacións Unidas discriminación a falantes de galego e reclamou que se respecten os seus dereitos.

No marco do 29º exame periódico universal do Consello de Dereitos Humanos de Nacións Unidas celebrado en Xenebra, o presidente da Mesa, Marcos Maceira, criticou -xunto a outras entidades do Estado que forman parte de ELEN- unha discriminación ás linguas oficiais distintas do español, ao tempo que fixo unha chamamento ás autoridades de España para o cesamento inmediato desta situación.

Así, Maceira alertou de "casos moi graves, que vulneran calquera principio democrático e de respecto pola dignidade dos pobos e as persoas que os compoñen, que teñen lingua propia e a quen non se lles permite exercer dereitos cidadáns e humanos fundamentais se o fan na súa lingua".

A xeito de exemplo expuxo un caso en Vigo que se xulgará o 21 de xullo, tras ser admitida a trámite a denuncia dun paciente a quen se atrasou case dous anos unha operación tras requirir asinar a correspondente autorización en galego. Segundo expón, o impreso non lle foi facilitado ata seis meses despois "co conseguinte agravamento do seu estado de saúde".

"Casos como este ou persoas ás que se rexeita en entrevistas de traballo o dereito fundamental de expresarse na súa lingua, ou desatención, insultos e ameazas por parte dos Corpos de Seguridade do Estado deben ser coñecidos pola comunidade internacional porque quen despreza a lingua dun pobo está a desprezar un pobo, e eses é racismo", denunciou Maceira.