PSOE e BNG asinan o pacto de coalición para a Deputación da Coruña

O socialista Valentín González Formoso e a dirixente do BNG Goretti Sanmartín asinaron este mércores o acordo para gobernar en coalición a Deputación da Coruña durante os próximos catro anos, unha lexislatura na que aspiran a promover un “adelgazamento competencial” deste organismo e dar un maior protagonismo aos concellos.

A partir deste xoves, cando se celebrará o pleno de constitución do organismo provincial, González Formoso, alcalde das Pontes, será presidente da institución provincial e Sanmartín a súa vicepresidenta, tal e como se contempla no acordo de goberno rubricado.

Un acordo que, en opinión de Sanmartín, supón “un paso adiante na construción dunha nova arquitectura institucional para Galicia”.

Pola súa banda, o socialista sinalou que o acordo reflicte a “ilusión” compartida, que é “a superación” do actual modelo de Deputación. “A nosa intención é que a percepción da xente sexa que lle é útil” a deputación, apuntou o futuro presidente do organismo provincial.

TRANSFERENCIA DE SERVIZOS

Así, un dos principais puntos do acordo é superar o modelo actual e promover “un adelgazamento competencial, de equipamentos e centros”, indicou Sanmartín, que avogou por iniciar nestes tres primeiros meses un proceso de negociación de transferencias cara á Xunta e cara aos concellos.

Precisamente, os consistorios son outro dos eixos do acordo. Así, apostan por dar máis protagonismo aos concellos que, segundo explicou a nacionalista, “poderán decidir os recursos que van utilizar” e poder administralos directamente.

Preguntado por futuras fusións municipais, o rexedor das Pontes apostou por fórmulas “intermedias” despois de asegurar que a experiencia de Oza-Cesuras non ofreceu os resultados que esperaban.