Campaña de control de velocidade en vías de Galicia, até o domingo 26

A dirección Xeral de Tráfico (DXT) inicia este luns unha campaña de control de velocidade nas estradas convencionais e nas vías urbanas. Esta iniciativa, que forma parte da programación anual da DXT, desenvolverase até o domingo 26.

Segundo informou a Delegación de Goberno en Galicia, a campaña estará coordinada polas xefaturas provinciais de tráfico, que confeccionaron os percorridos para que o número de vehículos controlados sexa maior que o de campañas anteriores.

A pesar de que o número de coches controlados pola Agrupación de Tráfico da Garda Civil incrementouse nun 100% na última década, o obxectivo é conseguir unha maior redución da velocidade media e diminuír os niveis alcanzados de grandes excesos.

Deste xeito, a DXT busca concienciar aos condutores da “estreita relación” entre unha velocidade inadecuada e os accidentes. E é que, segundo indicou, a diferenza da incompatibilidade entre o alcol e a condución ou o uso do cinto de seguridade e do casco, que non son cuestionados, a consideración da velocidade como factor de risco non adquiriu o mesmo nivel de aceptación entre os condutores, e iso a pesar de que no 22% dos accidentes mortais en vía interurbana apreciouse a velocidade como factor concorrente.

En zonas urbanas a velocidade é igualmente determinante, por canto aumenta considerablemente o risco de morte dun peón tras ser atropelado, de aí a importancia da observancia dos límites. A partir de 80 quilómetros por hora é practicamente imposible que un peón se salve dun atropelo, mentres que a unha velocidade de 30 quilómetros por hora o risco redúcese ao 10%.

Para a realización da campaña, Tráfico explicou que “utilizará o máximo número de medios humanos e materiais dispoñibles”. Así mesmo, sempre que sexa posible, tanto os paneis de sinalización variable como as pantallas alfanuméricas dos vehículos da Agrupación de Tráfico que estean nas inmediacións, advertirán aos condutores da existencia próxima de controis.

O LIMIAR DE TOLERANCIA DE RADARES, UNIFICADO

En todo o territorio da DXT permanece unificado o limiar da tolerancia co que actúan os radares: de 7 km/h para límites até 100 km/h e do 7% para límites superiores, de maneira que o condutor coñecerá cal é exactamente a velocidade a partir da cal calquera radar denunciará. Isto non modifica en ningún aspecto o cadro de sancións e puntos a detraer por exceso de velocidade.

A Lei de Seguridade Viaria e o Regulamento Xeral de Circulación fixan a normativa aplicable aos límites xenéricos e específicos de velocidade, velocidade en adiantamento e distancias entre vehículos. O incumprimento destas normas está tipificado como infracción grave ou moi grave, sancionadas con multas de 90 a 600 euros.

RESULTADOS DO VERÁN PASADO

Na campaña específica de control de velocidade desenvolvida en Galicia desde o 18 até o 24 de agosto de 2014, controláronse 74.619 vehículos e formuláronse un total de 2.862 denuncias, producíndose un terzo das mesmas en fin de semana (de venres a domingo).