Detidos os tres autores dun secuestro exprés cometido en xuño en Compostela

Unha das vítimas do secuestro exprés ocorrido en xuño en Santiago

A Policía Nacional detivo, de xeito graduado e desde o pasado agosto, a tres mozos como presuntos autores do secuestro de dous homes cometido na capital galega, e para dous deles ordenouse cárcere, mentres que o outro está en liberdade con cargos.

Os feitos que motivaron as investigacións ocorreron na tarde-noite do pasado 16 de xuño, cando un cidadán alertou mediante unha chamada ao 091 de que nun balcón da Avenida de Lugo se atopaban dous homes coas mans atadas ás costas e cos ollos vendados pedindo auxilio. Os axentes comisionados, tras acceder á vivenda, lograron liberalos. Ambos foran atados fortemente con bridas en pés e mans, un deles ademais presentaba un forte golpe na cabeza e varios hematomas.

Os investigadores, tras analizar o sucedido, iniciaron xestións para determinar as circunstancias e o móbil do que desde un primeiro momento parecía ser un "secuestro exprés". Finalmente, logrouse determinar que o ocorrido tratouse en realidade do que no argot policial sec coñece como un envorco que non saíu segundo o previsto.

QUÉ É UN ENVORCO? Dar un "envorco" significa roubar a droga, é dicir, que as vítimas quedarían cos que foron os seus captadores para realizar unha venda de droga, neste caso presúmese que haxix, pero en lugar dunha transacción o que se produce é o secuestro exprésdos vendedores, o cal normalmente se prolonga o tempo que os captadores tardan en colocar a mercancía roubada. Finalmente, as investigacións concluíron coa detención e posta a disposición xudicial dos tres presuntos autores.

Capturalos foi complexo, en tanto que os tres "colegas" se separaron e levaban unha vida aparentemente normal, incluso un deles se trasladou á localidade de Ribeira na que finalmente foi detido no mes de xullo, mentres que os outros dous arrestos foron en Santiago, o do primeiro a mediados de agosto e o do último implicado o pasado 8 de setembro.

Crese que estes tres homes de entre 21 e 39 anos, de nacionalidade dominicana, dos que dous xa contaban con antecedentes, puideron realizar algún outro feito similar, polo que continúan as investigacións. Nos rexistros efectuados tras as detencións non se puido localizar nin a droga presuntamente subtraída nin tampouco gran cantidade de diñeiro; igualmente, non se localizou a arma de fogo que presuntamente utilizaron para intimidar ás súas vítimas.

Os detidos pasaron a disposición do xulgado de instrución número tres da capital galega que leva o caso, decretándose o ingreso en prisión provisional para dous deles, mentres que outro quedou en liberdade con cargos.