As licenzas para a construción de edificios de nova planta crecen un 8,8% en agosto en Galicia,

As licenzas concedidas en Galicia en agosto para a construción de edificios de nova planta foron un total de 98, o que supón oito máis que as 90 do mesmo mes de 2014 (+8,8%), segundo datos feitos públicos este luns polo Instituto Galego de Estatística (IGE).

Así figura na estatística 'Construción de edificios', na que figura que estas licenzas permitirán construír 90 novas vivendas, fronte ás 64 de agosto de 2014, un aumento do 40,6%.

Así mesmo, sobre edificacións xa existentes concedéronse licenzas para 96 obras de rehabilitación (catro menos que hai un ano) e nove para obras de demolición de edificios (tres menos que en agosto de 2014).

Pola súa banda, o número de licenzas concedidas en agosto deste ano para rehabilitar vivendas foi de 15 (eran 17 hai un ano), mentres que o número de vivendas a demoler foron 10 (catro menos que as 14 de 12 meses antes). Así, a variación neta do parque de vivendas deste mes foi, polo tanto, positiva (95 vivendas novas).