O Concello de Pontevedra colga a pancarta de Ence Fóra

O balcón do Concello de Pontevedra luce dende este xoves unha pancarta co lema 'Ence fóra dá ría para sempre'. Trátase dun xesto que segundo o alcalde da cidade, Miguel Anxo Fernández Lores (BNG) demostra que as forzas políticas representadas na corporación teñen "maioritariamente" unha posición "moi clara" a favor de recuperar a ría para os pontevedreses. 

Trala colocación da pancarta, o rexedor fixo un chamamento á cidadanía para que participe na manifestación convocada este venres para expresar de maneira "contundente" o rexeitamento á decisión do Goberno de prorrogar 60 anos a concesión da fábrica de Ence en Lourizán.

Fernández Lores insistiu en que esta decisión "non é definitiva" e, neste sentido, considerou que a mobilización social "debe facer reflexionar" a quen avala a continuidade da pasteira en Lourizán, para evitar repetir un "erro" que se cometeu hai máis de 50 anos "a punta de bayoneta", ao autorizarse a instalación da fábrica na ría durante o franquismo.

CRÍTICAS DO PP E CIDADÁNS

A colocación desta pancarta no balcón da Casa Consistorial desatou as críticas entre os grupos políticos municipais do Partido Popular e de Cidadáns. Desde as filas populares, César Abal lamentou que o BNG empregue "o balcón de todos os pontevedreses coma se fose o seu valo publicitario", convertendo ao edificio institucional "na casa de 'tócame Roque'", porque entende que nesa pancarta "non están representados" todos os pontevedreses.

Pola súa banda, a portavoz de Cidadáns, María Rey, coincidiu en que o grupo de goberno "non pode utilizar as instalacións municipais no seu beneficio", ao entender que son propiedade de todos os pontevedreses. Asegura que o balcón do Concello utilizouse de novo para "réditos políticos propios" e acusou a BNG e PSOE, "que cando estiveron na Xunta non quitaron Ence", de utilizar este asunto "para tapar as deficiencias que ten esta cidade".

PSOE E MAREA

O portavoz do grupo municipal do PSdeG-PSOE, Agustín Fernández, tras participar no acto de colocación da pancarta, cualificou a prórroga de Ence como un "ataque inadmisible" fronte ao que, dixo, "hai que defenderse e pasar ao contraataque". O responsable socialista entende que con esta pancarta está a "facerse o que demandan os veciños", reflectindo o "sentir maioritario" e augurou que, coa súa postura, o Partido Popular converterase nunha forza política "residual" en Pontevedra.

Finalmente, Marea Pontevedra sumouse a este acto ao entender que a decisión de prorrogar a permanencia de Ence "vai prexudicar a moitas xeracións de pontevedreses", segundo o seu portavoz, Luís Rei, que pediu participación cidadá na protesta deste venres.