R sube os prezos a cambio de máis internet

A compañía R acaba de anunciar unha subida nas súas tarifas de móbil de entre 1 e 2 euros, efectiva a partir do mes de marzo. A cambio, ofrecerán máis megas de Internet nas súas tarifas. 

Esta subida prodúcese poucos meses despois de que Euskatel se fixese co control da compañía galega, pero segundo indican dende R esta circunstancia non ten que ver coa subida de prezos. Aseguran que a subida se trata dunha resposta a unha demanda dos usuarios, que reclamaban mellores conexións de datos. 

En concreto, os usuarios que tiveran contratada a tarifa Plana 12 pasarán a pagar un euro máis, pasando de 1 a 1.5GB o seu límite de conexión a internet. 

No caso das tarifas Plana 20 e Plana 30, o prezo sube 2 euros, pero os usuarios que as teñan contratadas verán duplicado o seu plan de datos, de 1.5 a 3GB e de 3 a 6GB respectivamente.