Pontón pide menos papeletas e "máis debates" para o 26-J
O BNG reclama unha campaña sen envío masivo de papeletas e debates a nivel galego
O BNG acaba de presentar as súas propostas de cara á campaña electoral do 26-J, que pasan por suprimir o envío masivo de papeletas aos fogares para aforrar 50 millóns de euros e celebrar debates en Galicia, tanto entre os candidatos como entre os líders políticos.
Ana Pontón, portavoz nacional do bloque, mostrouse partidaria de "aforrar recursos públicos" na campaña pero "sen recortar a democracia", eliminando o 'mailing' electoral. Esta medida supón, segundo sostivo, un aforro económico e ecolóxico e, ademais, permite gañar "transparencia". De feito, como lembrou, a súa formación xa renunciou a esta práctica desde as últimas eleccións europeas, celebradas en maio de 2014.
Como alternativa, Pontón pide que se celebren "máis debates", xa que contribúen a que a sociedade teña "unha opinión máis formada" para os próximos comicios. "Os cidadáns teñen dereito", recalcou a responsable do Bloque, quen retou ao presidente da Xunta e do PPdeG, Alberto Núñez Feijóo, a demostrar se, como ao seu xefe de filas, Mariano Rajoy, "lle cansan" os debates ou está disposto a "dar a cara". Así mesmo, instou á dirección da CRTVG a organizar estes actos e "en horario de máxima audiencia".
Escribe tu comentario