​As pensións galegas seguen entre as máis baixas de España

As pensións galegas seguen estando entre as máis baixas do conxunto do estado. A pesar de ter subido un 1,9% con respecto a maio do ano pasado, a pensión media galega segue sendo a segunda máis baixa de toda España.

Un pensionista galego cobra de media 761,53 euros, fronte aos 902,31 de media que se cobra no noso país.

Por provincias, a contía media das pensións en Galicia supera os 800 euros na Coruña e Pontevedra (803,23 e 802.26 euros, respectivamente), pero queda por baixo dos 700 en Lugo e Ourense (674,24 e 656,90 euros, respectivamente).

POR TIPOS

A pensión media por xubilación en Galicia foi de 864,70 euros en maio, fronte aos 1.041,15 euros da media estatal, e percibíronas 467.638 persoas (179.638 na Coruña, 144.762 en Pontevedra, 74.504 en Lugo e 68.734 en Ourense).

Mentres, por viuvez, a pensión media galega foi de 539,67 euros, para un total de 186.853 beneficiarios (73.721 na Coruña, 57.516 en Pontevedra, 29.512 en Lugo e 26.104 en Ourense).

A pensión media por incapacidade permanente, que recibiron 68.951 galegos (25.924 na Coruña, 22.629 en Pontevedra, 10.343 en Lugo e 10.055 en Ourense), foi de 825,44 euros.

Pola súa banda, as pensións por orfandade tiveron un valor de media de 368,67 euros (24.099 galegos téñenas declaradas) e por favor de familiares a pensión chega a 475,37 euros (6.059 perceptores).

MÁIS DE 8.000 MILLÓNS

A Seguridade Social destinou neste mes de maio a cífra récord de 8.467,3 millóns de euros ao pago das pensións contributivas, un 3,04% máis que no mesmo mes de 2015.

A maior parte dos 8.467 millóns de euros destinados a pagar a nómina das pensións foi a parar ás pensións de xubilación, con 5.947,6 millóns de euros (+3,7%), seguido das pensións de viuvez, ás que se dedicaron 1.501 millóns de euros (+1,3%).