A Deputación de Lugo consegue aprobar os Orzamentos deste ano

O pleno da Deputación de Lugo aprobou en sesión extraordinaria deste luns os orzamentos de 2016 co apoio de PSOE, de PP e do deputado non adscrito Manuel Martínez, e o voto en contra do BNG, socio de goberno dos socialistas na institución provincial con dous deputados.

Para sacar adiante as contas, socialistas, populares e o deputado non adscrito chegaron a un acordo que contempla quince puntos e que presentaron en rolda de prensa conxunta despois do pleno o presidente provincial, Darío Campos, a portavoz popular, Elena Candia, e o deputado non adscrito, Manuel Martínez.

O acordo dá luz verde a un orzamento de 96,3 millóns de euros para 2016, dos cales 4,5 millóns destinaranse ao Plan de Obras e Servizos e polo menos 1,5 millóns de euros nos orzamentos do próximos catro exercicios, para o Servizo de Axuda non Fogar. As políticas de emprego levan o compromiso dun investimento mínimo de tres millóns de euros para este 2016, cun programa de axudas destinadas aos concellos de menos de 20.000 habitantes para a contratación de novos traballadores.

Entre as concesións ao PP, o presidente provincial asumiu o compromiso de respectar o disposto nos convenios aprobados durante o curto mandato da popular Elena Candia, en 2015.

O voto afirmativo do deputado non adscrito e alcalde de Becerreá, Manuel Martínez, ten que ver coa decisión de poñer en marcha a construción dunha residencia da terceira idade de carácter comarcal neste municipio. Para este 2016, consígnase unha cantidade máxima de 500.000 euros. O orzamento financiarase nun mínimo de catro anualidades, con cantidades máximas de dous millóns de euros en cada unha delas. Ademais, Becerreá deberá achegar polo menos 300.000 euros.

UN "DÍA DE ALEGRÍA"

O presidente provincial sinalou que se trata dun "día de alegría", aínda que "non total" polo voto en contra do BNG. Con todo, confirmou que a aprobación dos orzamentos é "unha boa noticia para a provincia".

A portavoz popular, Elena Candia, expuxo que o seu grupo "sempre ofreceu concesións e intentos de acordo" nos últimos meses" e cualificou sesión plenaria deste luns de "día histórico" para a provincia.

Finalmente, o deputado non adscrito sumouse ao cualificativo de "día histórico" e celebrou a incorporación aos orzamentos da construción da residencia da terceira idade de Becerreá.