​Sanidade defende que os colapsos das Urxencias do CHUS son illados

A Asociación de Pacientes e Usuarios do CHUS reuniuse coa Valedora do Pobo para explicarlle persoalmente o motivo da denuncia realizada no mes de febreiro ante esta institución en relación coas "reiteradas situacións de colapso" do Servizo de Urxencias do Hospital Clínico.

A resposta de Sanidade defende que se trata de "feitos puntuais" e pon en dúbida a veracidade dos datos denunciados. A asociación agradece, a pesar da resposta, a "boa disposición" da Valedora para escoitar e para "entender en que consiste realmente a nosa demanda e promover algún tipo de solución" que poida servir para "aliviar en parte a situación padecida" nas Urxencias do CHUS.

Desde a asociación de pacientes recordan que o 56% dos ingresos hospitalarios se fai a través das Urxencias, un dato "que dá idea da súa repercusión no bo funcionamento da Área Sanitaria".