​A Muralla de Lugo esconde "un pequeno túnel"

O conselleiro de Cultura, Román Rodríguez, desvelou este mércores, durante unha visita á Muralla Romana de Lugo, que se toparon "cunha pequena sorpresa" nun tramo do monumento, concretamente no cubo seis, onde foi localizado "un pequeno túnel".

"En certa medida fálanos dun monumento que, estando moi vivo, depáranos sorpresas todos os días", dixo o conselleiro, que está á espera dos resultados que se obteñan do dito descubrimento. "A muralla é un símbolo desta cidade, creo que transcende a cidade, é un símbolo de todos os galegos", destacou.

O responsable de Cultura subliñou que hai "constantes obras en marcha" e estase realizando "un plan de priorización das obras en función das prioridades e das necesidades" do Monumento. En canto a ese cubo, o seis, e esa "sorpresa nova", insistiu en que se está "investigando, para ver como se materializa e coñecer o que realmente hai aí".

"Isto é unha tarefa constante de actualización, de limpeza, é unha tarefa constante de mantemento que compartimos co Concello --de Lugo--", concluíu.