A moza desaparecida na Pobra foi vista por última vez a un quilómetro da casa

A moza de 18 anos Diana María Quer López-Pinel, desaparecida desde o luns no municipio da Pobra do Caramiñal, foi vista por última vez a un quilómetro da vivenda onde veranea coa súa familia.

Segundo informou o 112 Galicia, efectivos de Protección Civil de Ribeira sumáronse este mércores ao operativo de procura, coordinado pola Garda Civil. A Policía Local indicou ao servizo de emerxencias que a moza regresaba dunha festa cando foi vista por última vez, a un quilómetro aproximadamente, da vivenda onde veranea coa súa familia.

Desde que os seus familiares presentaron a denuncia ante a Garda Civil, axentes da Policía Local e distintas agrupacións de voluntarios de Protección Civil da Pobra, Porto do Son, Boiro e Ribeira, así como familiares e veciños colaboran na procura da moza.

A rapaza mide 1,75 metros, ten o pelo longo liso e moreno, ollos escuros e pesa uns 55 quilos. A última vez que foi vista vestía pantalón curto rosa, camiseta branca e sudadera e calzaba zapatillas negras con cordóns.