Un ano despois, Carral lembra ás vítimas do rali

O municipio de Carral lembrará este martes ás vítimas do accidente do rali da Coruña, un día despois de que se cumpra un ano do sinistro no que faleceron sete persoas o 5 de setembro de 2015, entre elas dous menores e unha muller embarazada, ao paso da proba por esta localidade.

En concreto, o Consistorio organizou unha misa funeral, ás 21,00 horas, na igrexa parroquial situada no centro do municipio.

"É a única forma que temos de demostrar que estamos con eles", sinalou o alcalde, José Luis Fernández Mouriño, sobre os familiares das vítimas, aos que se comunicou a organización do funeral.

Fernández Mouriño admitiu que, estes días, o recordo do sucedido pervive entre os veciños do municipio, que nestas datas celebra, ademais, as súas festas patronais. Así, remarca que o accidente está "na memoria de todos".

O RALI, APRAZADO

Preguntado se se celebrarán novos eventos deportivos deste tipo, o alcalde asegurou que a escuadra non solicitou facelo. "Non é o momento", admite tamén pola coincidencia desta data co aniversario do accidente.

Ademais, avoga por que, no caso de que o Rali da Coruña volvese pasar polo municipio, o fixese por unha zona distinta e menos próxima ao centro do municipio.

Mentres, desde a organización deste evento, One Seven Racing avanzan, na súa páxina de Facebook, que a XXI edición do rali da Coruña quedou aprazado e que, motivos alleos á súa vontade, obrigan a trasladar a proba a decembro.

Por outra banda, indican que seguen traballando "para sacar adiante o rali e render homenaxe ás vítimas e familias da fatídica pasada edición", apuntan.

Pola súa banda, no ámbito xudicial, estase á espera de que a Audiencia Provincial da Coruña se pronuncie sobre o recurso presentado contra o arquivo das dilixencias por parte do Xulgado de Instrución número 8 da Coruña ao entender que a organización cumpriu coas esixencias que se lle impuxeron para minimizar o risco.