​Feijóo comprométese coa nova facultade de Medicina e co Ano Xacobeo 2021

O presidente da Xunta en funcións e candidato do PPdeG á reelección, Alberto Núñez Feijóo, ratificou o seu compromiso de construír unha nova facultade de Medicina en Santiago de Compostela, nas inmediacións do Hospital Clínico, ademais de garantir medidas en varios ámbitos para que o próximo Ano Xacobeo 2021 sexa "o mellor da historia do país".

O aspirante popular culminou en Santiago unha intensa xornada aínda de precampaña na que percorreu catro das sete urbes galegas (tamén estivo en Lugo, A Coruña e Ferrol) para desagregar as súas promesas electorais. Este mércores prevé visitar as tres restantes (Ourense, Vigo e Pontevedra) para incidir nunha mensaxe reiterada en todos os seus actos: "só" o PPdeG ten programa fronte ao "único" obxectivo dos seus rivais de expulsalo da Xunta.

Coa Catedral compostelá ao fondo e acompañado de varios candidatos ligados á cidade, así como do presidente local do PP, Agustín Hernández, comprometeuse cunha nova facultade de Medicina en Compostela nas inmediacións do Clínico, que se "ampliará". "E acordaremos coa USC dedicar a actual facultade a centros institucionais", apostilou.

Incidiu tamén na "importancia" de preparar o Xacobeo 2021 para que sexa "o mellor da historia do país". Para iso, avanzou que se continuará "ata a súa finalización" a restauración "integral" da Catedral de Santiago.

"Tanto na estrutura da Catedral como no interior e nas capelas que a conforman e acabaremos as obras do Monte do Gozo", subliñou, para engadir que tamén se remodelará a entrada dos Camiños na cidade (nas zonas de Concheiros, San Lázaro e o Polígono do Tambre), co fin de "amplialas, melloralas e realizar a integración paisaxística".

Para todo iso, avanzou que pedirá "colaboración" institucional e volveu a vista cara ao Concello compostelán, que dirixe Martiño Noriega, de Compostela Aberta. "Que saiban o Concello e os veciños que queremos mellorar a imaxe ante os peregrinos", defendeu, á vez que ratificou tamén o seu compromiso con facer a Cidade Administrativa de San Caetano aproveitando "o desprazamento" da estación de autobuses coa intermodal.

NOVA RESIDENCIA DE MAIORES

Ao tempo, avanzou que, se está nas súas mans, se creará unha unidade terapéutica de Alzheimer e unha nova residencia de maiores dotada de 120 prazas en Compostela. Explicou que, a tal fin, xa se localizaron "varias parcelas" e propoñerán ao Consistorio a súa cesión para poder desenvolver esta infraestrutura.

No ámbito local, prometeu tamén unha nova escola infantil de 82 prazas "de conformidade e en colaboración" coa Fundación Amancio Ortega.

LIGAZÓN DA AP-9 CO GAIÁS E OUTROS COMPROMISOS

O aspirante popular á reelección tamén fixo públicos outros compromisos en materia de infraestruturas, como a variante de Aradas e a súa intención de iniciar, "por fases" e en función da dispoñibilidade orzamentaria, a conexión por autovía desde A Estrada cara a Compostela e o desdobramento do Corredor entre Brión e Noia.

Tamén se comprometeu a 15 novos quilómetros de sendas para "facilitar os desprazamento peonís e ciclistas" no perímetro urbano da capital galega, así como a "execución" da ligazón da AP-9 coa Cidade da Cultura co fin de que "conecte non só co Gaiás, senón con Fontiñas e facer unha nova ligazón cara ao centro".

En público ratificou tamén Feijóo a promesa de iniciar en 2017 as obras da estación intermodal de Santiago sempre que a cidade adecuase "o seu plan”, á vez que avanzou a finalización das melloras da depuradora da Silvouta e o impulso dunha nova en Ou Souto mediante un convenio co Ministerio.

60 NOVAS VIVENDAS

Entre a súa listaxe de compromisos, incluíu a construción de 60 novas vivendas de promoción pública en Santiago, facilidades para a venda dos polígonos de Sigüeiro e A Sionlla, ampliacións en centros educativos composteláns e garantiu o apoio ao Campus Vida e aos tres centros singulares de investigación da Universidade de Santiago de Compostela.