Comeza a excavación en Alfacar para atopar a fosa de Lorca

O equipo de arqueólogos da asociación Regreso con Honor retirou este luns uns 600 metros cúbicos de terra na zona de Alfacar onde podería estar enterrado Federico García Lorca, fusilado en agosto de 1936 xunto ao mestre republicano Dióscoro Galindo e os banderilleros anarquistas Francisco Galadí e Joaquín Arcollas.

No primeiro día de traballo desta nova procura, o presidente da asociación e arqueólogo Javier Navarro, que coordina os traballos xunto ao investigador Miguel Caballero, subliñou a Europa Press o "rendemento óptimo de baleirado" desenvolvido no terreo, máis da metade dos 800 metros cúbicos que calcula han de retirarse para que a zona quede tal e como estaba antes de que se iniciasen as obras dun campo de fútbol nesta área coñecida como o Penedo do Colorado.

Un maquinista que conduce a retroexcavadora cedida pola Junta de Andalucía para retirar o material de recheo traballa en coordinación con cinco arqueólogos, e o apoio dun camión.

Dado o bo ritmo dos traballos, a primeira fase, prevista para dúas semanas, poderíase "abreviar" ata "chegar ao nivel de terreo natural" no que se traballará na retirada do "manto vexetal descomposto" e "moi ennegrecido" que serve aos científicos como referencia para comezar a traballar sobre o chan orixinal na procura dos pozos que puideron ser usados como fosas comúns, unha delas a de García Lorca, Galindo e os dous banderilleros, segundo as fontes manexadas.

Este estudo prevese "moito máis lento para non exceder o nivel natural", engadiu Javier Navarro.

A actuación, que se prolongará durante unhas tres semanas, foi posible tras conseguir a asociación os permisos da Junta e o Concello de Alfacar, así como o financiamento necesario.