Os centros sanitarios precisan sangue do grupo A-

As reservas do grupo sanguíneo A negativo (A-) atópanse baixas na Comunidade galega, mentres que as da positivo (A+), Cero positivo (0+) e Cero negativo (0-) seguen normais, segundo a información facilitada este martes pola Axencia de Doazón de Órganos e Sangue (Ados).

Este organismo, a través dun comunicado, lembra que para poder atender as necesidades dos centros sanitarios galegos son necesarias 500 doazóns de sangue cada día, polo que subliña a importancia de acudir a doar de todos os grupos sanguíneos.

Co fin de facilitar a doazón, a Axencia dispón na súa web os puntos fixos nos que se pode doar e aqueles a onde acuden as unidades móbiles.

O vindeiro luns, día 17, as unidades móbiles da Ados desprazaranse ás localidades coruñesas de Mugardos, A Coruña, Sada e Boiro; ás pontevedresas de Nigrán, Bueu, A Illa e Pontevedra; a Baños de Molgas e Xunqueira de Ambía (Ourense); e ao Páramo e Láncara (Lugo).

O martes, as unidades chegarán a Ferrol, A Coruña e Boiro; a Marín, Pontevedra, Vigo, Vilanova e Bueu; a Ourense e a Meira (Lugo). O mércores será a quenda para Ferrol, A Coruña, e Santiago; para O Grove, Vigo e Redondela; para Palas de Rei e Lugo e para Ourense.

O xoves poderán doar nas unidades móbiles os habitantes de Ferrol, A Coruña, Santiago e Ames, na provincia da Coruña; O Grove, Vigo e Ponteareas, na de Pontevedra; A Rúa e Ourense capital, na de Ourense; e Lugo cidade. Para concluír a semana, as unidades chegarán a Fene, A Coruña, Betanzos, Rianxo e Ames, na Coruña; Cambados, Tui e Ponteareas, en Pontevedra; Ourense cidade e Monforte (Lugo).

O sábado, finalmente, estarán en Fene, Rianxo e Cambre, na Coruña; Cambados e Tui, en Pontevedra; e O Corgo e Baralla, na provincia de Lugo.