​Crespo non aclara se usaba un programa para encriptar documentos

A fiscal anticorrupción Concepción Sabadell mostrou ao presunto número dous da trama Gürtel, Pablo Crespo, un email que lle foi remitido por unha persoa identificada como 'Maxwell Smart', o personaxe da serie de televisión Superagente 86, á dirección de correo electrónico lalocadechueca@gmail.com. A fiscal quería saber se recibira nese correo un programa de encriptación de documentos, pero Crespo non o aclarou.

Durante a sesión deste martes do xuízo que segue a Audiencia Nacional pola primeira época de actividades da rede dirixida por Francisco Correa, Crespo admitiu que este dominio era da súa propiedade.

No correo electrónico, Maxwell Smart enviaba a Crespo a factura dun disco duro externo e comentáballe detalles sobre o prazo de entrega dun computador portátil. Tamén mencionaba un "programa" informático que, segundo sospeita a fiscal, podía servir para a encriptación de documentos.

O email mostrado a Crespo en formato dixital contaba cun documento adxunto coa denominación "blocking Kremlin encryption". Preguntado sobre se se trataba dun sistema para protexer o intercambio de información, Crespo asegurou que non lembraba a mensaxe.