A reparación da memoria histórica chega á Deputación de Pontevedra

"Na memoria das persoas que foron encarceradas, torturadas e xulgadas nestes dous edificios por defender a lexitimidade democrática fronte ao alzamento fascista de 1936". Así reza a inscrición da placa que desde este sábado permanece nos xardíns provinciais, entre o Edificio Administrativo e ao Pazo provincial na Avenida de Montero Ríos.

A placa, que foi descuberta pola presidenta e vicepresidente da Deputación de Pontevedra, Carmela Silva e César Mosquera, respectivamente, lembrará para as xeracións presentes e futuras o papel que ambos os edificios desempeñaron durante a represión de 1936, segundo indicou o propio ente provincial nun comunicado.

.@carmelasilva e @Xosleal descubren a placa conmemorativa no acto #DepoMemoria pic.twitter.com/Rc1JTBu19Q

— DeputaciónPontevedra (@depo_es) 12 de noviembre de 2016

"Tanto o Pazo como o Edificio administrativo foron, tras o golpe fascista, desposuídos da súa condición de símbolos da soberanía do pobo e pasaron a ser usados como cárcere --o Edificio administrativo-- e como lugar onde se celebraban os xuízos e os consellos de guerra --o Salón de Plenos do Pazo--", relatou a Deputación.

A xornada de Reparación da Memoria continuou no Salón de Plenos, onde o deputado de Cultura e Lingua, Xosé Leal, explicou o significado desta homenaxe e actuou como condutor de todo o acto.

O 12 de novembro de 1936, na rúa de Campañó, ao seu paso polo Concello de Poio, foron fusiladas 10 persoas por defender a democracia e a República e por opoñerse ao golpe fascistas de xullo dese mesmo ano. Entre as persoas asasinadas atopábanse dous expresidentes e varios funcionarios da Deputación de Pontevedra, segundo indicou a Deputación.