​Segur Ibérica comunica aos 50 traballadores que lles abonará as nóminas que lles debe

Segur Ibérica, cun total de 4.000 traballadores en toda España, uns 700 en Galicia, comunicou aos sindicatos da provincia da Coruña que abonará as nóminas que debe a 50 empregados entre este luns e o martes.

Mentres, e ata que se materialicen os pagos, continúa o peche que protagonizan membros de CC.OO., CIG e USO na sede de Oleiros, onde se reuniron con responsables da empresa.

Tamén UGT --que non está presente no peche-- mantén o calendario de concentracións que anunciou como medida de presión ata que os 50 compañeiros cobren.

En concreto, esta organización ten convocada, á espera de novos acontecementos, unha concentración para este mércores 23 fronte á estación de tren da Coruña, de 17,00 a 18,00 horas.

As protestas, de non producirse os pagos dos soldos, continuarían os seguintes mércores: a 30 fronte ao Gadis Hiper do Burgo, o 7 de decembro en Jealsa en Boiro, o 14 en Navantia en Ferrol e o 21 na sede de Red Eléctrica na Coruña.

ERE

Por outra banda, o inicio da negociación do expediente de regulación de emprego (ERE) que anunciou a empresa aprazouse ata o vindeiro luns 28.

Ese día, en Madrid, a dirección da compañía, que prové de vixiantes a numerosos clientes, achegará aos sindicatos a documentación sobre o axuste previsto.