​Os mariñeiros sirios que solicitaron asilo en Marín abandonan o barco

Os sete tripulantes sirios que chegaron ao porto de Marín (Pontevedra) a bordo do buque 'Lady Boss' xa cobraron os salarios que lles debía a empresa armadora desde setembro e abandonaron o barco.

Tras pedir asilo político para evitar regresar a Siria en pleno conflito bélico e lograr que a súa petición de asilo fose admitida a trámite, os mariñeiros sirios obtiveron o chamado cartón vermello e en diante será a ONG Accem a que atenda a súa situación, a través do Ministerio de Emprego e Seguridade Social. A inspectora de ITF Luz Vaz confirmou que a dotación de nacionalidade búlgara aínda segue a bordo, pendente de percibir os soldos pendentes.

É a primeira vez que o porto de Marín recibe solicitantes de asilo de orixe siria, rexistrándose casos de polisóns procedentes de países como Alxeria ou Costa do Marfil. A intención inicial dos refuxiados sirios "non é quedar en España", tal e como explicaron ao avogado que tramitou a súa petición de asilo, Gregorio Cantón, senón que sería "lugar de tránsito" cara a Centroeuropa, concretamente Alemaña.

Con idades entre os 25 e os 45 anos, trátase de cidadáns sitios "non implicados en ningunha minoría" política, nin relixiosa, nin étnica. "O que motivou a súa decisión para pedir asilo foi que a compañía lles comunicou que ían volver a Siria", sinalara Cantón, sobre o próximo porto no que este barco --con bandeira de Comores-- faría escala, tras deixar en Marín o cargamento de pedra que traía nas súas adegas.

O buque aínda non partiu porque, a petición da Federación Internacional dos Traballadores do Transporte (ITF, polas súas siglas en inglés), segue retido pola Capitanía Marítima mentres non abone os soldos pendentes ao resto da tripulación.