​Evacuado en helicóptero un mariñeiro que se mancou nun brazo en Muros

Imaxe do operativo de rescate. //Foto: @GardacostasGal

Un mariñeiro foi evacuado en helicóptero tras sufrir un accidente ao lesionarse un brazo a bordo dun pesqueiro cando pescaba preto do municipio coruñés de Muros.

Segundo informou o 112 Galicia, o mariñeiro lesionouse nun brazo mentres pescaba pola Ría de Muros. O ferido foi trasladado ao Hospital Álvaro Cunqueiro (HAC) de Vigo polo helicóptero 'Pesca I', dependente da Xunta.

O accidente produciuse pasadas as 19,00 horas do martes cando o traballador pescaba a bordo dunha embarcación chamada 'Gaviota'. Estaban a faenar nunha zona coñecida como os Baixos do Gruño, preto de Monte Louro, en Muros.

O persoal do Servizo de Gardacostas recibiu a petición de Salvamento Marítimo e informou ao CAE 112 Galicia da súa saída.