Galicia rexistrou 345 novas sociedades mercantís e disolveu 118 en outubro

|

Empresas gallegas

Galicia rexistrou 345 novas sociedades mercantís en outubro, o que supón un 20,6 por cento máis que o mesmo mes de 2015, mentres que se disolveron 118, un 0,8 por cento menos que hai un ano.


Así o reflicte a estatística de Sociedades Mercantís publicada este mércores polo Instituto Nacional de Estatística (INE), que indica que o capital subscrito para a constitución das 345 empresas ascendeu a 11.588.000 euros.


Dúas das novas sociedades mercantís creadas en Galicia eran sociedades anónimas cun capital subscrito de 560.000 euros e 343, sociedades limitadas cun capital de 10.796.000 euros.


En outubro na Comunidade galega 111 sociedades mercantís ampliaron capital por 48.365.000 euros, catro delas sociedades anónimas por un montante de 12.294.000 euros; e 107, sociedades limitadas opr 36.071.000 euros.


Mentres, das 118 sociedades mercantís disoltas en Galicia en outubro, 93 foron voluntarias, 11 por fusión e 14 por outras causas, segundo os datos do INE. Pola súa banda, 21 sociedades reduciron capital cun capital subscrito de 8.025.000 euros.


DATOS ESTATAIS


A constitución de novas sociedades mercantís retrocedeu un 4,2% o pasado mes de outubro respecto ao mesmo mes de 2015, ata sumar 7.129 empresas, segundo informou este mércores o Instituto Nacional de Estatística.


Co descenso de outubro, a creación de sociedades mercantís rompe unha serie de seis meses consecutivos de ascensos interanuais despois de subir un 14,8% en abril, un 9,3% en maio, un 12,7% en xuño, un 1,7% en xullo, un 23,4% en agosto e un 5,2% en setembro.


O capital social subscrito no décimo mes do ano para a constitución de novas sociedades aumentou un 20,5% respecto ao mesmo mes de 2015, ata os 718 millóns de euros, mentres que o capital medio por sociedade avanzou un 25,9% e situouse en 100.724 euros.


Durante o mes de outubro un total de 2.180 empresas ampliaron capital, un 10,9% menos que un ano antes, por un importe superior aos 1.774 millóns de euros (-40,4%) e cun capital medio de 814.045 euros, o que supón un 33,1% menos que en igual mes de 2015.


O número de disolucións de empresas incrementouse un 0,9% respecto de outubro de 2015, con 1.543 sociedades desaparecidas. Delas, o 67,9% disolvéronse de forma voluntaria, un 12,8% por operacións de fusión e o 19,3% restante por outras causas.


En taxa mensual (outubro sobre setembro), a creación de sociedades mercantís incrementouse un 5,1%, o seu menor crecemento neste mes polo menos desde 2012, mentres que a disolución de sociedades aumentou un 26,3%, tamén o seu menor repunte do últimos cinco anos.


O 22,7% das sociedades mercantís creadas no décimo mes do ano dedícase ao comercio e o 13,7% á construción. En canto ás sociedades disoltas, o 21,1% pertence ao comercio e o 16,5% á construción.


A actividade con maior capital subscrito nas sociedades mercantís creadas en outubro foi a de inmobiliarias, financeiras e seguros, con 574,4 millóns de euros, en tanto que información e comunicacións presentaron o menor capital, con 3,3 millóns de euros.


MADRID E CATALUÑA ENCABEZAN A CREACIÓN DE EMPRESAS


Madrid, Cataluña e Andalucía foron as comunidades autónomas que máis sociedades mercantís crearon o pasado mes de outubro, con 1.625, 1.428 e 1.196 sociedades, respectivamente, mentres que A Rioxa (28), Navarra (57) e Cantabria (66) foron as rexións que menos empresas fundaron.


Atendendo ás sociedades mercantís disoltas, as comunidades autónomas que presentaron un maior número de disolucións foron Madrid (493), Andalucía (220) e Comunidade Valenciana (148). Pola súa banda, as que rexistraron menos sociedades mercantís disoltas foron Navarra e A Rioxa (12) e Estremadura (16).


En termos relativos, as rexións que experimentaron en outubro os maiores crecementos interanuais na creación de sociedades mercantís foron Galicia (+20,6%), Asturias (+17,8%) e Baleares (+12,5%). Os maiores descensos interanuais anotáronllos Castela e León (-25%) e País Vasco (-19,3%).


En canto ás sociedades disoltas, as comunidades coas taxas positivas máis altas foron Asturias (+70%), Comunidade Valenciana (+24,4%), e Andalucía (+14,6%). Pola contra, as que presentaron as maiores baixadas foron Castela-A Mancha (-46,2%), Estremadura (-38,5%) e Murcia (-29,2%).

relacionada ​A metade do emprego creado en 2016 corresponde a comercio e hostalería
relacionada O FMI pide a España novas reformas do mercado laboral
relacionada Inditex medra a un ritmo do 9% e crea un de cada cinco empregos en España

Sin comentarios

Escribe tu comentario




No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.
Este periódico fue seleccionado por Google News Initiative para su Journalism Emergency Relief Fund

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal Cookies Consejo editorial Publicidad
Powered by Bigpress