Galicia perdeu case 14.000 habitantes en 2015
Representa o 0,5% da poboación, que queda en 2.718.525 persoas.
Galicia perdeu un total de 13.822 habitantes en 2015 (-0,51%) ata quedar cun total de 2.718.525 persoas a data 1 de xaneiro de 2016, fronte aos 2.732.347 dun ano antes.
Así figura nas cifras oficiais de poboación resultantes da revisión do Padrón municipal ao 1 de xaneiro de 2016, que publica este luns o Instituto Nacional de Estatística (INE). Do total de habitantes de Galicia, 1.309.809 son homes e 1.408.716 son mulleres.
Deste xeito, a perda de poboación en Galicia (-0,51%) está por encima do descenso medio (-0,14%), e é o quinto máis acusado entre comunidades, só por detrás de Castela e León (-0,99%), Castela-A Mancha (-0,85%), Asturias (-0,82%), Aragón (-0,70%), e con igual retroceso que Cantabria (-0,51%).
A provincia que máis habitantes perde é A Coruña, cunha caída de 4.397, ata quedar en 1.122.799. A segunda con maior descenso é Ourense, cunha perda de 3.538 persoas, ata 314.853.
En Pontevedra, ao longo de 2015 perdéronse 3.028 habitantes, cun padrón de 944.346 persoas. Lugo é a que experimenta o menor retroceso, 2.859 habitantes menos, e queda en 336.527.
Escribe tu comentario