​A Policía Nacional asume a investigación do ataque á lucense fonte de San Vicente

O corpo xudicial da Policía Nacional de Lugo asumiu a investigación sobre o ataque á fonte de San Vicente na Praza do Campo, en pleno centro histórico de Lugo, na madrugada do sábado, cando se derrubou a estatua e quedou gravemente danada.

Fontes da propia comisaría de Lugo confirmaron que a Policía xudicial é a que se fixo cargo "da investigación".

Desde a asociación Lugo Monumental, o seu presidente, David Fernández, defendeu que é "necesario incrementar a seguridade no centro histórico e non só agora pola fonte, senón polo que sucede habitualmente coas pintadas, as mexadas e os problemas que hai coas cargas e descargas".

Tamén aproveitou para pedir ao Concello de Lugo que "axilice a recuperación da figura de San Vicente para colocala no seu sitio". "Os asociados estamos desgustados, é unha consternación absoluta polo significado que ten a fonte, a praza e a figura de San Vicente", esgrimiu.

Fernández explicou que Lugo Monumental "móvese ao redor desa fonte", ao "adoptar" como "un punto emblemático a Praza do Campo e a fonte ten un significado máis especial".

"A PINGA QUE COLMA O VASO DO VANDALISMO"

Na mesma liña pronunciouse o viceportavoz do PP no Concello de Lugo, Antonio Ameijide, que cualificou de "feito lamentable" o sucedido. "É a pinga que colma o vaso do vandalismo na cidade", sentenciou.

Así mesmo, anunciou que pedirán ao goberno local que se "incremente a presenza policial" no centro de Lugo para concluír que espera que a Policía "busque canto antes ao culpable e que todo o peso da lei recaia sobre o que fixo este dano ao patrimonio de todos os lucenses".