Galegos en Berlín observan calma tras o ataque terrorista
Ven "difícil" un aumento dos controis ao ser unha urbe de grandes dimensións, sen un centro claro e coas zonas turísticas difuminadas
Galegos afincados en Berlín e de viaxe na capital alemá observan calma un día despois do atentado e destacan que na cidade "sempre hai moita policía", polo que ven "difícil" que se vaia a producir un aumento dos controis, fundamentalmente ao tratarse dunha urbe de grandes dimensións, sen un centro claro e coas zonas turísticas difuminadas.
Estefanía Ojea, natural do Carballiño (Ourense) e que traballa nunha axencia de publicidade, relata que este martes Berlín amenceu como un día máis. Ela tivo que desprazarse en metro para ir ao seu centro de traballo e non había máis controis dos habituais.
Ademais, precisamente este martes debeu facer transbordo na zona na que se produciu o atropelo co camión o luns, nun coñecido mercado do Nadal da cidade. A rúa seguía cortada e no lugar había numerosos medios de comunicación, pero xa fora retirado o vehículo.
Este luns tivo coñecemento da noticia a través do seu teléfono móbil, cando o acendeu e viu que tiña múltiples chamadas de contactos españois que se interesaron por saber se estaba ben. Atopábase na casa dunha amiga, sen batería no seu terminal.
A súa residencia atópase a uns 5 quilómetros dese mercado do Nadal, uns 20 minutos en transporte público, pero preto da súa vivenda pasa unha estrada pola que oíu pasar moitas ambulancias. "Non lle prestei atención, porque é normal oír sereas nesta cidade", comenta.
O que si lle chamou a atención foi a actitude de compañeiros de traballo este martes, cando cambiou a súa oficina habitual por unha alemá coa que colabora a súa empresa. "Ninguén dixo nada do tema, falaban do que cearan o día anterior pero nada sobre o atentado", explica, algo que atribúe á forma de ser dos alemáns.
Sobre o que pasará de aquí en diante, descarta que se vaia producir un aumento dos controis. Comenta que Berlín é "moi grande, ten moitos espazos abertos e non é, por exemplo, como París, onde a zona turística está toda xunta".
UN TURISTA QUE ESTIVO NESE MERCADILLO O DÍA ANTERIOR
Pola súa banda, o xornalista lucense Pablo Vázquez Sande, que viaxou a Berlín o sábado e que regresaba este martes da capital xermana, relatou que respirou "bastante calma" tras o atentado.
Vinte e catro horas antes do atentado, o domingo, estivo nese mercadillo sobre o que se lanzou o camión homicida, e á hora do atentado estaba "noutro punto turístico", na Porta de Brandenburgo, e apenas percibiu nada do ocorrido.
A "imaxe" o día despois é de "máis policía --por este luns-- pola tarde". "Hai máis policías, axentes con fusís. Hai unha maior sensación se seguridade", sinala.
O que lle chama a atención son as bandeiras a media hasta en edificios da administración alemá, pero advirte que "o ambiente é de bastante calma".
Asume que "sempre" pode quedarche "no pensamento" que "lle podería pasar a un", pero avoga por "non obsesionarse". "Hai que gozar e non deixarse amedrentar polos terroristas", destaca.
Escribe tu comentario