Feijóo: "Os bancos teñen a obriga legal e moral de devolver as cláusulas chan"

O presidente da Xunta, Alberto Núñez Feijóo, opinou este xoves sobre a sentenza do Tribunal de Xustiza da Unión Europea que obriga aos bancos para devolver os importes cobrados en concepto de cláusulas chan para subliñar que as entidades financeiras teñen "a obrigación legal" e tamén "moral" de ingresar eses fondos "de oficio" aos seus clientes.

Feijóo incidiu en que "as sentenzas hai que cumprilas" e, neste sentido, considerou que "o lóxico" é que os bancos ingresen eses importes "de oficio", sen esperar ás reclamacións.

Dentro desa formulación de "defensa dos consumidores", o mandatario sinalou que a Xunta pon a disposición dos galegos afectados "todos os medios legais e de asesoramento" que existen no Instituto Galego de Consumo e da Competencia.

As súas sete oficinas distribuídas en toda Galicia darán información e asesoramento gratuíto, uns datos aos que tamén se pode acceder a través da súa páxina web. Ademais, como indicou o presidente, haberá xornadas informativas en distintas vilas e cidades galegas para os afectados por este produto bancario que "non era legal" segundo os tribunais de Xustiza.