Santamaría reivindica a figura de Rajoy: "Á fronte do temón hai un galego con personalidade"

A vicepresidenta do Goberno, Soraya Sáenz de Santamaría, contrapuxo a situación interna do PP, "un partido unido cun líder forte e sereno", en alusión ao xefe do Executivo central, Mariano Rajoy, coa confrontación no seo de Podemos. "No PP os debates non nos enfrontan, enriquécennos", proclamou.

No acto de presentación do Relatorio Económico e de Administración Territorial, a debate no congreso estatal que os populares celebrarán en febreiro e coincidirán coa cita de Vista Alegre II de Podemos, Sáenz de Santamaría subliñou que "é bo" que cada "certo tempo" os membros dos partidos se reúnan "para poñer a punto" a formación e o seu ideario.

"Convén actualizarse", subliñou, antes de aludir ás ideas que sustentan ás forzas políticas e de referirse á actualidade informativa, marcada no foco estatal polo enfrontamento no seo de Podemos entre Pablo Iglesias e Íñigo Errejón, para incidir en que a "diferenza" co seu partido é que no PP "os debates non enfrontan", senón que "enriquecen".

"LÍDER FORTE E SERENO"

Santamaría mostrouse convencida de que o acordo interno ao redor da folla de ruta que debe seguir o partido desde unha perspectiva tanto económica como territorial é que, dentro do PP, os seus militantes defenden "sobre todo unha cousa: unha España unida, solidaria, que quere avanzar e quere ser líder".

"Somos un partido unido cun líder forte e sereno. Somos ambiciosos e non nos conformamos; un partido que asume a responsabilidade de estar pendentes dos problemas dos cidadáns", aseverou.

A "ÉPICA" DO PP

A continuación, a vicepresidenta do Goberno reivindicou "a épica do PP". E é que, argumentou, aos populares "sempre" lles toca o mesmo, cada vez que toman as rendas do Executivo central: "sacar a España da crise" á que conduce, esgrimiu, a xestión do PSOE. "E todas as veces que gobernamos, fixémolo", apostilou.

Así, lembrou que en 2011 o PP "colleu un país ao bordo do abismo" e defendeu que, "se hoxe España está como está", é porque "á fronte do temón hai un galego con personalidade, ao que ninguén marcaba os tempos e que, por encima de todo, sabía que quería que España seguise sendo soberana e dona do seu destino".

"Debe ser que marca moito nacer aquí, aínda que de catedrais (coa de Santiago ao fondo) outros tamén poderiamos falar", chanceou, entre aplausos dos asistentes.