A Asociación de Médicos Interinos de Galicia (Asmig) denunciou que, nos "últimos meses", se producen "serias demoras" en citas de especialidades, que supoñen "un serio perigo" para a confirmación de diagnósticos de sospeita de enfermidades "potencialmente graves".

Nun comunicado, a asociación asegurou que un destes casos se produciu na área sanitaria da Coruña, cando a un paciente se lle asignou a data do 1 de decembro de 2016 para acudir a unha cita de Neuroloxía para descartar unha neuralxia.

"Estas enfermidades son seriamente limitantes e molestas para os pacientes e inciden de forma moi negativa na súa calidade de vida", sinalou Asmig, que indicou que, en moitos casos, "nin sequera se alcanza a perfilar un diagnóstico correcto" posto que a "tardanza en ser estudados os casos clínicos por especialistas desemboca no abandono das citas por parte de pacientes cada vez máis desmotivados".

"As demoras en cita previa para atención especializada non son tolerables, polo menos nas marxes agora denunciadas", considerou a asociación, para asegurar que "máis dun ano para ser consultado por un especialista non é unha mera anécdota, senón un síntoma palpable dun fallo estrutural serio que xera colos de botella intolerables para atender uns mínimos criterios de calidade asistencial".

Ante iso, explicou que son os propios médicos de atención primaria os que deben "redobrar esforzos" na realización de exploracións previas alcanzables xa que, en moitos casos, as probas complementarias "non están ao alcance do médico de familia ou son rexeitadas polos protocolos de especializada".

"SOBRECARGA LABORAL"

Para a asociación, esta "sobrecarga" laboral supón un esforzo engadido á xa considerable carga de traballo e á ausencia de cobertura mediante contratos de interinidad de longa duración. Así, puxo como exemplo que, para o próximo mes de decembro, serán adxudicadas "só 11 prazas" en atención primaria na área sanitaria da Coruña e "nin sequera está asegurada a cobertura do 50% das vacantes por falecemento ou xubilación".

Nesta liña, criticou que a Oferta Pública de Emprego (OPE) "tampouco permitirá paliar a tremenda precariedade na profesión, xa que moitos médicos interinos carecen de estabilidade persoal e profesional e non poden afrontar proxectos de futuro".

Por iso, a asociación considera necesario "aplicar a Lei de Función Pública de Galicia e converter en funcionario con praza fixa ao grande número de interinos existente".

(fuente: galicié hoxe)