Rafael Louzán podería anunciar hoxe a súa renuncia

O PP de Pontevedra reúne este venres unha xunta directiva na que estará presente o líder dos populares galegos, Alberto Núñez Feijóo. O obxectivo é convocar o vindeiro congreso da formación provincial, no que previsiblemente Rafael Louzán se despedirá tras cinco mandatos. 

Trala saída de Baltar pai, Louzán converteuse no líder provincial que leva máis anos á fronte do partido, aínda que como adoitaba recordar é "o máis novo" dos que ata agora exercían como presidentes provinciais do PPdG: 

Nos últimos anos viuse salpicado por causas xudiciais como a Operación Patos, ademais de perder o goberno da Deputación de Pontevedra en favor dos socialistas. 

Segundo varios dirixentes populares, na última campaña "xa estaba de retirada", polo que o máis probable parece que siga os pasos de Carlos Negreira e renuncie a presentarse de novo. 

A presenza de Feijóo en Pontevedra dá aínda máis opcións a esta teoría. O líder dos populares galegos ten previsto comparecer xunto a Louzán, como fixo o pasado mércores con Negreira. 

FUTURO DE BARREIRO

Se se confirma a marcha de Louzán, o único dirixente popular pendente de aclarar o seu futuro será José Manuel Barreiro, o actual presidente do PP de Lugo e voceiro dos populares no senado. 

Este venres tamén se reunirá a xunta directiva en Lugo para convocar o próximo congreso que, en principio, do mesmo xeito que os outros tres,se celebrara duranteo mes de marzo. Aínda que Barreiro non dixo publicamente cal é a súa decisión, dirixentes da provincia consultados  auguran que repetirá.

Entre os argumentos expostos sinalan que foi nomeado de novo portavoz dos populares no Senado, polo que non parece que haxa un indicativo de que queira "abandonar a vida política". Sen unha alternativa "visible e evidente", membros da dirección do partido en Lugo teñen a "percepción" de que "seguirá". "Se quere seguir, seguirá", aseguran.