Pedro Sánchez acepta reunirse con Podemos, EU e Compromís

O secretario xeral do PSOE, Pedro Sánchez, respondeu positivamente á proposta lanzada polo voceiro de EU para sentarse nunha mesa a 'catro' con Podemos e Compromís. 

Sánchez confirma por tanto a súa disposición nunha "reunión de traballo" que xa aceptaran tanto Podemos como Compromís, recalcalndo que o obxectivo é "pactar un programa para a investidura, que proxecte na lexislatura a acción dun goberno progresista e reformista".

Á vista dos resultados do 20 de decembro, recalca, vén traballando por "un entendemento entre distintas forzas políticas que permita un goberno alternativo ao do PP para levar adiante políticas progresistas".

"Con máis énfase véñoo dicindo desde que o presidente en funcións, Mariano Rajoy, renuncio a presentar a súa candidatura, e con esa finalidade remitín ás forzas políticas unha proposta de programa de Goberno que, como sabes, estamos a negociar con todos os partidos que así o quixeron", afirma.

Ademais, aproveita a carta para subliñar que, mentres algúns están "a traballar intensamente", hai que prefire que a "situación de interinidade se prolongue, co consecuente prexuízo para a maioría dos cidadáns, ou mesmo prefiren a convocatoria de novas eleccións, que levarían ata o mes de agosto a constitución do novo Goberno".

"Non é esa a actitude do PSOE, queremos seguir falando con todos os que apostan polo cambio", insiste Sánchez, que confirmou así a súa disposición para participar nesa reunión, que polo momento non ten data nin lugar.