Ana Pontón tratará de liderar o BNG

Ana Pontón acaba de formalizar a súa candidatura para converterse na nova líder do BNG. A deputada encabezará a candidatura 'oficial' da formación, proposta esta sábado polo Consello Nacional con vistas á próxima Asamlea Nacional que se celebrará o 28 de febreiro, na que se escollerá o relevo de Xavier Vence. 

Pontón confírmase por tanto como a aposta do máximo órgano de dirección do bloque para liderar o partido. Podería converterse na primeira muller que exercera o cargo de voceira nacional do bloque. Como número dous da candidatura, presentarase Goretti San Martín, vicepresidenta da Deputación da Coruña.

Aínda hai tempo para que aparezan novas candidaturas, o prazo oficial remata o vindeiro martes. 

PERFIL

Ana Pontón é militante da Unión do Povo Galego (UPG), co que, de facerse coas rendas do Bloque, sería a primeira ocasión en que este posto recae nun membro da forza hexemónica do BNG, tras os liderados de Xosé Manuel Beiras, Anxo Quintana, Guillerme Vázquez e Xavier Vence.

Esta licenciada en Ciencias Políticas pola Universidade de Santiago de Compostela, nacida en Sarria (Lugo) en 1977, exerce na actualidade como viceportavoz do BNG no Parlamento galego e procede das mocidades nacionalistas Galiza Nova. Accedeu ao Consello Nacional do BNG en 2001 e tres anos despois recalou no Parlamento galego.

A só uns meses das eleccións autonómicas, previstas para o próximo outono, a XV Asemblea Nacional, na que poderán votar 2.852 militantes, pretende rearmar á formación nacionalista tras diversos declives electorais, o último deles nos comicios do pasado 20 de decembro, cando o BNG quedou fóra do Congreso dos Deputados por primeira vez desde 1996.