Mensaxe de Feijóo para o PSdeG: "Isto é un Parlamento, non unha gardería"
Aproveita a estrea de Patricia Vilán como voceira para censurar o apoio dos socialistas a unha proposta do BNG
O presidente da Xunta, Alberto Núñez Feijóo, aproveitou unha pregunta xenérica sobre a situación política actual para censurar o "espectáculo" dos socialistas no parlamento, que apoiaron a tramitación dunha iniciativa do BNG na que se pedía un concerto económico para Galicia.
"Isto é un Parlamento, non unha gardería", sentenciou, antes de instar ao PSdeG para aclarar a súa "opinión" sobre a Constitución, o pacto "cos populismos" ou a proposta nacionalista da cota para que poida haber "un diálogo" cos populares.
Todo isto ante a estrea da nova voceira dos socialistas, Patricia Vilán, que lle preguntara polo autogoberno e polo financiamento autonómico, cuestionando a recente proposta de Feijóo de crear un fondo de cohesión demográfica. Asegurou que Feijóo deixou de pedir "transferencias" desde que o seu compañeiro do PP, Mariano Rajoy, está á fronte do Goberno central.
Na súa réplica, Feijóo deu a "benvida" a Vilán, á que trasladou o seu desexo de que PPdeG e PSdeG poidan "ter un diálogo construtivo", aínda que resten "poucos plenos" para que finalice a lexislatura. Ao tempo, reivindicou que "a transferencia máis importante" do seu mandato foi "manter" o autogoberno e que Galicia sexa "dona do seu destino".
Escribe tu comentario