Gómez Noya di adeus a Río

Javier Gómez Noya, pentacampión mundial de triatlon, sufriu unha fractura no seu brazo esquerdo que o obriga a pasar polo quirófano e a dicir adeus aos Xogos Olímpicos de Río de Janeiro.

O mércores pola tarde caeu "case en parado" mentres adestraba na bicicleta. As radiografías que lle fixeron no hospital confirmaron a gravidade da lesión: fractura con desprazamento na cabeza do radio.

O triatleta centrou esta temporada en chegar a punto á cita olímpica, deixando de lado o mundial. Por iso, se cabe, é máis difícil de asumir a ausencia: "É difícil de entender como de repente se vai todo o esforzo e ilusión que puxen nos Xogos Olímpicos. Pode ser que sexa o momento máis duro da miña vida deportiva. Pero non me queda máis remedio que asumilo e pensar en ter unha boa e rápida rehabilitación", lamentou Gómez Noya.

Con esta baixa, España perde unha das súas principais opcións de medalla nas competicións olímpicas.